瞓覺嘅時候唔熄燈又或者唔熄電視，相信唔少朋友都試過，有可能係怕黑又可能係怕太靜。
如果你想減肥，特別係女性，或者就要戒左呢個習慣。
主要原因係燈或者電視發出黎嘅光可以干擾我地嘅生理時鐘，健康嘅生理時鐘有助調節新陳代謝、血壓等等嘅機能。如果呢個環節出現左問題，出現癡肥、高血壓、抑鬱等等嘅機會就會增加。
《美國醫學會內科醫學期刊》（JAMA Internal Medicine）近日公佈嘅研究有資料顯示，如果夜晚瞓覺嘅時候開著燈／電視，呢啲行為會令到我地無形中咁增磅，慢慢變肥。
（Excuse Me! Are you Serious?!）
研究搵咗接近44000個年齡介乎35-74歲女性作為研究對象，分析佢地嘅睡眠習慣，譬如瞓覺嘅時候有無開燈、定只係開床頭燈、又或者係開著電視。如果夜晚只係開著好暗好暗嘅床頭燈，就無顯示同肥胖有關係，但開著燈或者係電視，會令人喺5年之內增重11磅嘅機會增加17%，超重甚至乎癡肥嘅機會就會分別增加22% 同33%。
研究作者之一，美國國家環境衛生科學研究所流行病學分會主席Dale Sandler博士指，好多人都知道睡眠不足係一種導致體重增加嘅原因，不過由於研究只係根據數據作出觀察，並唔能夠印證睡眠時候嘅燈光同肥胖存在因果關係。提供嘅資料都只係自評報告，意味著唔少問題，例如燈光有幾強等等，仍然不得而知。如果要證明有直接嘅影響，要再作更加深入嘅研究。
另一位研究作者 Chandra Jackson博士指，喺我地日常生活入面，如果長時間比人造光線照著（如電視光、街燈、招牌嘅燈光等等），會改變荷爾蒙或者其他生理作用，影響到我地嘅健康。
咁要點樣解決呢？ 非常簡單，專家建議將電視或者其他電子產品撤出房間，營造適合嘅睡眠環境。
訓得好，健康自然可以改善到。