千層蛋糕，雞批，酥皮湯，蛋撻。。。相信係好多朋友都好鍾意食嘅野黎。
但近日消委會調查發現近年我地鍾意嘅「Lady M」千層蛋糕， 食一件所攝取嘅反式脂肪就佔左我地成人每日攝入上限嘅27%， 接近4包麥當勞薯條嘅攝入量。
消委會聯同食安中心喺市面上嘅連鎖快餐店、外賣店、蛋糕店同餐廳等等，搜集左75款嘅糕點、酥皮湯等等樣本，檢測各類型嘅脂肪含量。
喺26款批、撻、酥皮卷入面，雞批反式脂肪平均含量最高，食一件雞批攝入量幾乎係每日上限嘅一半，即係每日可以食多過2件。
測試亦發現，酥皮忌廉湯嘅酥皮反式脂肪平均含量偏高，一碗酥皮連湯嘅反式脂肪含量，合共已經等同世衛建議每日攝入上限嘅77%。
何謂反式脂肪？
據食安中心解釋︰「反式脂肪屬於不飽和脂肪，當油加入氫，從液體轉為半固體時，可產生反式脂肪。此程序稱為『氫化過程』。食品製造商通常採用此方式以延長食物的保質期和增加口感。用氫化植物油為材料或用於烹調的煎炸（炸薯條、薯片）和烘培食品（蛋糕、曲奇餅）多含有反式脂肪。」
消委會引述世衛資料，反式脂肪同飽和脂肪會增加我地血液「壞膽固醇」嘅含量，當中反式脂肪同時會減少「好膽固醇」嘅含量，增加罹患冠心病嘅風險。亦建議我地少食油炸或高脂嘅烘焙食品，煮食時可轉用比較健康嘅食油替代人造牛油，例如粟米油、葵花籽油、芥花籽油及橄欖油等。
根據世衛資料，每年有大約54萬死亡病例同攝入工業生產嘅反式脂肪有關。如果反式脂肪攝入量每天超過2.2克，死於冠心病嘅風險則會增加28%；攝入過量總脂肪，會增加患心臟病、肥胖症同其他癌症嘅風險。
呢Ｄ好食不過唔太健康嘅野食，為左我地嘅健康，都係間唔中食下無妨，少食為妙。